გეგმის მიხედვით, Porsche-მ წელიწადში 25 000 Porsche 911 და 718 უნდა გამოუშვას. ლოგიკურია ვიფიქროთ, რომ ყოველწლიურად ქარხანას მრავალი იდენტური ავტომობილი დატოვებს. თუმცა, ეს ასე არ არის.

ცოტა ხნის წინ, გამოცემა Autocar-მა Porsche-ს ქარხნების მენეჯერთან, კრისტიან ფრიდლთან საუბრისას გაარკვია, რომ როგორც წესი, გერმანული ავტომწარმოებელი წელიწადში მხოლოდ ორ იდენტურ 911-სა და 718-ს აწარმოებს.

საქმე ეხება Porsche-ს მოდელების პერსონალიზაციას. გარდა ამისა, ბაზარზე არსებობს 911-ის სულ მცირე 39 ვარიანტი და 718-ის 718 Boxster/Cayman მოდელები. ანუ, მომხმარებლებს შეუძლიათ მანქანა საკუთარი საჭიროებების შესაბამისად შეარჩიონ; შესაბამისად, არსებობს ძალიან ბევრი შესაძლო კომბინაცია.

როგორც ჩანს, Porsche მხოლოდ ამით არ კმაყოფილდება — ფრიდლის განცხადებით, ავტომწარმოებელი თავის მანქანებში უფრო მეტი პარამეტრის გაშვებას გეგმავს. გამომდინარე აქედან, არ არის გამორიცხული, რომ არც თუ ისე შორეულ მომავალში, მისი ყოველი ავტომობილი ერთმანეთისგან განსხვავდებოდეს.

718-ის ხაზს ცოტა ხნის წინ შეემატა ახალი Boxster Spyder-ი და Cayman GT4. ორივე მათგანი აღჭურვილია 4.0-ლიტრიანი ატმოსფერული ექვსცილინდრიანი ოპოზიტური ძრავათი, 414 ცხენის ძალით. გარდა იმისა, რომ ორივე მოდელს მძღოლზე ფოკუსირებული ბუნება აქვს, ისინი აღჭურვილია მხოლოდ ექვსსიჩქარიანი მექანიკური გადაცემათა კოლოფით, რომელიც ენერგიას უკანა თვლებს აწვდის.